Trivnaðarætlan

Í  Hoyvíkar skúla vilja vit at allir næmingar trívast og mennast. Tí hava vit orðað eina trivnaðarætlan, ið sigur hvussu vit í skúlanum eiga at vera hvør móti øðrum. 

Í Hoyvíkar skúla leggja vit okkum eftir góðum samstarvi millum skúla og heim, og at næmingurin

• kennir lærugleði
• kennir seg tryggan í skúlanum
• kennir seg sæddan og hoyrdan
• kennir seg sum ein týðandi part av einum felagsskapi, har virðing er fyri hvørjum øðrum

 

Trivnaðarskapandi átøk

Skúlin og lærararnir skapa trivnað í skúlanum við niðanfyristandandi átøkum og tiltøkum:

• viðkomandi undirvísing – bæði eftir torleikastøði og gjøgnum fjølbroytt og viðkomandi evni
• greiður telefonpolitikkur; næmingar lata telefonina inn, tá ið skúladagurin byrjar
• tiltøk ið skapa trivnað og fjølbroytni í skúladegnum, t.d. útferðir, setursskúli, føstulávint, rennidagur, roknivika, evnisvika, verkætlan, v.m.
• í grunddeild arbeiða vit við granskingargrundaða tilfarinum Betri vinir, sum er við til at byggja góðan felagsskap
• í fríkorterunum eru sjónligar garðvaktir á øllum økjum, umframt at spæliliðið skipar fyri spølum í grunddeild
• næmingaráð í øllum deildum, soleiðis at næmingarnir fáa ávirkan og kenna ábyrgd
  foreldrasamstarv, foreldrafundir og -viðtalur, umframt samskifti eftir tørvi
    

Flokslærarar og toymi ganga á odda fyri felagsskapinum og trivnaðinum:

• arbeiða við góðari floksmentan og felagsskapinum í flokkinum
• møta rættstundis og fyrireikað
• leggja boð út á vikuætlanina í góðari tíð
• skipa næmingasamrøður árliga og eftir tørvi
• gera innanhýsis trivnaðarmeting tvær ferðir árliga
• skipa fyri trivnaðarløtum eftir tørvi
• skipa fyri trivnaðarskapandi tiltøkum, hugnakvøldum, floksveitslum e.l.
• varnast toymið mistrivnað ella happing, boðar flokslærarin heiminum, umframt leiðsluni frá beinanvegin
   

Heimið saman við næminginum ger sítt til at:

• næmingurin er væl hvíldur, mettur og hevur matpakka við
• næmingurin fylgir vikuætlanini
• næmingurin møtir rættstundis og fyrireikaður
• næmingurin heldur skil á tasku, bókum og pennahúsa
• næmingurin sýnir ábyrgd og virðing fyri lutum í skúlanum
• næmingar og foreldur tosa virðiliga um skúla, lærarar, næmingar og onnur foreldur
• næmingar og foreldur fylgja virðisgrundarlagnum hjá skúlanum
• varnast heimið happing ella mistrivnað, fakliga ella sosialt, boðar heimið flokslæraranum frá
   

Átøk, tá ið vit síggja tekin um mistrivnað ella happing:

• flokslærarin boðar leiðsluni og heiminum frá
  
  • toymið arbeiðir við avbjóðingini við AKT-læraranum sum ráðgeva.arbeitt verður eftir tillagaða systematik myndlinum
  • aðrir aktørar, sum kunnu verða tiknir við í trivnaðararbeiðið eru heilsufrøðingurin, SSP og Sernám