Boðklivi
Góðu foreldur,
Tað er sera týdningarmikið, at tit fylgja við vikuætlanini, so tit vita, um børn tykkara skulu hava svimjiklæðir við ella ikki. Í dag vóru tað fleiri næmingar, sum ikki høvdu svimjiklæðir við.
Tá vit fara at svimja við næmingunum, er tað eitt krav, at allir næmingar luttaka og eru við. Um okkurt er, sum ger, at ein næmingur ikki kann luttaka í svimjingini, skulu lærararnir fáa boð um hetta frammanundan.
Eftir nakrar vikur skifta vit, og tá eru tað genturnar, sum svimja. Tit foreldur eru tískil noydd at fylgja væl við vikuætlanini, tí broytingar kunnu koma fyri.
Vinarliga
Eva, Johan og Guðrun
Kunning um lesibøkurnar og skjalið, sum liggur í postmappuni
Góðu foreldur,
eg frætti, at summi tykkara eru í iva um lesibøkurnar og skjalið, sum liggur í postmappuni til tykkara at skriva og viðmerkja í. Umframt, at summi børn ikki hava somu bók sum onkur annar, at summi fáa eina bók, sum er langt niðri á listanum, bøkurnar verða ikki skiftar út o.a
- Skúlin hevur ikki 18 eintak av øllum bókum, tískil fáa næmingarnir tær ymisku bøkurnar við heim upp á skift, og ikki kronoligiskt eftir listanum. Øll sleppa at lesa allar bøkurnar, áðrenn vit fara víðari og skifta listan út :)
- Vit skifta bøkur hvønn mánadag. Um tað ikki hevur verið stundir til tess, skifta vit týsdagar.
- Minnist til at seta X í, tá barnið hevur lisið bókina ígjøgnum einaferð. Tað eru 3 X at seta, tvs, at barnið skal/kann lesa bókina 3 ferðir, áðrenn vit skifta bók
- Um einki X er skrivað á til bókina, sum liggur í postmappuni, verður bókin ikki skift út. Vit spyrja, um tey hava lisið bókina, men tað er ikki altíð, at tey vita og eru ofta í iva, tí bøkurnar líkjast. Tí er tað umráðandi, at tit seta X í :)
Um tit hava spurningar, sendið mær endiliga ein teldupost.
Vh
Eva, føroyskt lærarin í 1.b :)
ep1011k4@skulin.fo
Vit fara at skriva jólakort!
Næmingarnir fáa tvey jólakort at skriva (hetta verður gjørt í skúlanum) og senda til ein, sum tey ynskja. Tað kann vera ein gumma, gubbi, omma og abbi, fastir o.a. Bara ein, sum ikki býr á somu adressu sum barnið :)
Næmingarnir hava fingið ein seðil í postmappuna til at fylla út. Latið børnini hava seðilin við aftur í skúla skjótast gjørtligt.
Jólakortini skulu sendast við vanligum posti, og tí mugu vit hava adressuna hjá móttakarunum, og eisini
tykkara heimaadressu :)
Boð
Góðu foreldur, eg vil við hesum boða frá, at Mikas nú gongur í 1.b. Takið væl ímóti honum og foreldrum hansara.
Vh Guðrun
Foreldrafundur í 1. flokki – SSP
Góðu foreldur,
Hósdagin 6. november verður felagsforeldrafundur fyri foreldur í 1. flokki.
Tað er SSP, sum skipar fyri fundinum, og evnið verður skíggjanýtsla og onnur viðurskifti, sum hava týdning fyri trivnað og sosiala menning hjá børnunum.
SSP er eitt samstarv millum skúlan, sosialráðgevingina og løgregluna, sum hevur til endamáls at styrkja trivnaðin hjá børnum og ungum og at fyribyrgja sosialum avbjóðingum.
Fundurin verður hildin í flokstovuni hjá 1. flokki, hósdagin 6. november kl. 18.00 – 20.00.
Vit vóna, at so nógv foreldur sum gjørligt hava møguleika at luttaka, tí fundurin gevur eitt gott høvi at fáa kunning, íblástur og prát um, hvussu vit saman kunnu stuðla børnunum í teirra gerandisdegi, bæði í skúlanum og heima.
Vinaliga,
Guðrun Horn Snæbjørnsdóttir
Spælibólkarnir byrja eftir heystferiuna. Eg havi gjørt bólkarnar og sett eitt tíðspunkt til hvønn bólk. Vit heita á tykkum um at halda hetta sum útgangsstøði. Um ikki liggur fyri at hava bólkin til ásettu tíð, er tað foreldrini sjálvi, sum mugu finna eina aðra loysn – t.d. býta um við onkran annan í flokkinum, so at bólkurin ikki steðgar upp.
Endamálið við spælibólkunum er, at næmingarnir læra hvønn annan betur at kenna og fáa møguleika at vera saman við nøkrum, sum teir ikki vanliga eru saman við. Hetta styrkir felagsskapin og er fyribyrgjandi ímóti happing. Somuleiðis er tað eitt gott høvi hjá foreldrum at møtast og læra hvønn annan at kenna.
Tað eru 4–5 næmingar í hvørjum spælibólki, og bólkarnir hittast umleið eina til tvær ferðir um mánaðin.
Ætlanin er ikki, at spælibólkurin skal vera eitt stórt tiltak, sum t.d. bowling ella bio. Heldur eiga børnini at uppliva ein vanliga og hugnaligan dag saman. Hetta kann t.d. vera at spæla borðspøl, baka, tekna, spæla úti ella okkurt annað, ið hóskar til aldrin. Tað er tann, ið hýsir bólkin hesa ferð, sum avgerð, hvat tey gera saman.
- Skíggjar (playstation, sjónvarp, teldlar o.l.) skulu ikki vera partur av spælibólkunum.
- Foreldrini skulu vera heima og tryggja, at øll trívast og eru við í spælinum.
- Tað er gott, um foreldrini støkka inn á gólvið til ein kaffimunn, tá børnini verða heintað – tað styrkir eisini samstarvið tykkara millum.
Vit gleða okkum at fara í gongd við hetta átak og vóna, at tit taka undir við tí. Eg fari at spyrja javnan inn til, hvussu tað gongur, fyri at stuðla undir, at tiltakið livir og riggar.
Vh Guðrun