Í ítróttafeløgunum arbeiða børn og vaksin við at menna sína ítróttargrein, meðan vit her arbeiða við fjølbroytni. Rørsla er meira enn tað, sum gongur fyri seg á vølli og í høll. Tað snýr seg um at vera virkin og nýta kroppin á ymsar mátar, bæði í náttúruni og í gerandisdegnum – í øllum veðri. Vit rópa tað rørslu”læra” av tí at næmingarnir eisini skulu læra nakað um hvat hendir í kroppinum.

Hesar seinastu tvær vikurnar eru næmingarnir slopnir at uppliva hetta, bæði við at hava súkklubryt, fara í fjøruna at fanga krabbar og við at ganga niðan á Kongavarða. Her hava næmingarnir spælt við sjóvarmálan og í hæddum, og upplivað rørslu í ymsum lendi og umstøðum, harav ment rørsluførið og eina fatan av hvat tað er at ganga í tara og í mosa, hørðum og bleytum lendi, og ment javnvágina.

Vit vóna, at næmingarnir fáa natúrliga rørslugleði og uppdaga, hvussu ymiskt vit kunnu brúka kroppin, bæði í spæli, læru og felagsskapi – í høllini, í náttúruni og í grannalagnum.